| ◄ Laisse DCXXXVII | Laisse DCXXXVIII | Laisse DCXXXIX ► |
« Sire », ce dit Rolant, « j’ai bien sovant ohi
« Conter de cist pechié qe vos me dites ci,
« Que un Sanson de Rome, qi Anibal fu fi,
« Un jor e per e mer e son frere mortri ;
« Ancor le remembrent li preste en lor casti.
« Mais l’en dit qe ce fu bien a cent ans compli.
En plorant dit le hermite : « Il a cent ans ausi.
« Je sui celui Sanson qe celu mortre fi.
« Le jor qe le hui feit, de Rome m’en fuï ;
« Dou jor e une nueit en un bos me tapi,
« Ne ja dedens cist terme ne menjai ne bevi.
« Dou pechié me trovai si formant repanti,
« S’il ne fust la sperance de divine merci
« Qe pardona celui q’en le flanch le feri,
« Iluech m’avroie mort, si fuse en tot peri ;
« Mais la some Pieté, ou je ancor me fi,
« Me fist fort et ardis entre ses enemi.
« Ou pape m’en alai, qe trovai en Orvi,
« E trestot nu pié l’angle devant lui me standi :
« Mon pechié li contai e ma coupe bati.
« Mout se mereveilla, qant ce dire m’oï ;
« Le congié me dona, pués me dist : « Biaus ami,
« Diés te pardone en ciel, le Roi qi ne manti.
« En feir la penitançe dou pechié q’as basti,
« Ne la me sai penser, mais de ma part t’outri
« Qe tu de toi la praignes e sois fort et ardi. »
« Adonque me signa, e larmoier le vi.