| ◄ Laisse DLXII | Laisse DLXIII | Laisse DLXIV ► |
Grant fu le preise intorn le duch d’Englent ;
Ne vos savroie bien dir intierement
Le grant honor qu’il hot par celle gent.
Le roi Souldain entre ses bras le prent,
Sanson l’acoulle et baise stroitement :
Iluec i fist de sun amor pressent
Que pué dura trusque sun finiment.
Chant il li ot osté sun garniment,
Joiant l’en maine Sanson et autre cent :
N’i a zel que n’ait zastel o teniment.
Grant fu le joie que li Persant firent ;
Rois Malquidant la feit tot autrement,
Que plaint et plure et sor le mort s’estent,
Ses zavoil tire et soi pasme sovent ;
Plorent li prince a qui plorer apent.
« Niés », dit li roi, « de vos pieté me prent
« Qu’estes oncis par moi tot soulement.
« Nuls millor home, fair an pués sagrement,
« Non moruit mais, et si nen sai choment :
« Fils, amblez m’estes par un enzantement.
« Se je onceïse tuit zels que sunt vyvent,
« Homes et fames et lor fils insement,
« De le venjance non seroie cuntent.
« Mais cist païs uns tels loer atent
« Par votre mort, et ert prochainement,
« Que tot ert ars decisque au fundament,
« La gent oncise et menee a torment. »
Alor se pasme, tot le cuers i desment.