| ◄ Laisse DLXXXII | Laisse DLXXXIII | Laisse DLXXXIV ► |
Molt se paine Rolant dou valet amender,
Ne il n’estoit pas lent a oïr et nouter.
Le duc por mi ces rue fait quintaine fermer :
Le fils des gentils home et de plus rices per
Li fait de jorn in jorn pezier et baorder
Et manjüer insanble et despandre et doner ;
Chun plus entr’ eus habite, mens li poit anuier.
Et non anoie mie a lui sovent aller
In chanbre a le roïne e a sa fille perler
Et mostrer ses paroles si cun por donoier ;
Sovant fait la poncele por amor suspirer
Et perdre la perole et le coulor müer.
In le cief dou terz mois, dos paisant pautoner,
Que sunt allés l’afaire Malquidant espïer,
Retornerent a Mech au roi Soudan noncier
Que ses nemis mortels fasoient invoier
De totes part lor home. Lor fait Soudan mander
Mantenant por Rolant, que a il vegne parler.