| ◄ Laisse DVI | Laisse DVII | Laisse DVIII ► |
Li estormant ne fine de monstrer
Al duc l’avoir e sa fille a loer.
Ni avoit plus soigne Roland a remirer
L’or ni l’arçant ne li draps d’outre mer
Cum un cheitis vilan d’un buen müé sparver.
« Je repousase », feit il, « bien volenter ».
Le prodome le veit a un lit amener
Qe en une çambre ilueqe estoit mout cher.
Li duc tot primerans va veoir son destrer,
E pois torna en la çambre o il doit repouser,
E Baudor li ala meismemant desarmer.
Quand il fu desgarnis, sil prend a regarder ;
A ses sarçant le monstre e comançe a jurer
Plus belle criature mais non nasqui de mer.
« Alés, seignor, dormir », ce dit Roland li ber.
« Je me vuel un petit solemant demorer ».
Cils istrent de la cambre, si vont a lor mester ;
Lor cordes e lor voiles penerent d’aprester,
Car a l’aube aparant voldront estai cançer.
Avant qe le niés Karle se vousist acouger,
En genoilon s’est mis por Damenediex proier :
Une oraixon comançe qe mout feit a loer.