| ◄ Laisse DVII | Laisse DVIII | Laisse DIX ► |
Belle fu l’oraxon cum vos poeç oïr :
« E ! Diex sans començaile, e ja non dois finir,
« Qe non volis Orgoil en ton reigne sofrir,
« Ainç le feisis dou ciel trabuçer e chaïr
« Quand il encontre vos fist penser de fallir ;
« Aprés de humaine carn volistes pois garnir
« Les sieges qe as angles fist Orguel relinquir ;
« Les quatres alimentes feisistes departir
« Li un da l’autre, el solel esclarir ;
« En set jor fu tot feit quant qe volistes dir ;
« E pois de limo terre formastes, magne Sir,
« Adam le primer hom, por lui a semonir
« Q’il non fust orgoilos ne qin devoit ensir ;
« Quand il fu espirei, sil feisistes dormir,
« D’une coste de lui, por vostre ovre complir,
« Formastes cele feme qe vos Fils fist morir,
« Qe manjua la pome, por qoi sunt en martir
« Tote la humane gent, en paine et en languir,
« Ele en dona son syre, sil fist vers vos falir ;
« Mantinant les feisistes dou sant vergier ensir
« Quand il non degnerent vos a coupe qerir
« Dou pechié q’orent feit sens li vostre plaisir :
« De ces dos sunt insus e li bons e li pir
« Qe a Infer aloient ceschuns prés lor finir,
« E neïs li prophete, a cui feisistes dir
« En le lor profities qe devoiés venir
« Por raïmbre les armes qu’erent en l’oscurir ;
« Sire, votre pieté deigna acunsentir
« A naitre de le Vergen qe fu notre remir ;
« Le jor qe vos nasquistes faïstes aparir
« Une stoille as troi qe vos vindrent querir.
« Ai ! cant se devoient li pastors esjoÿr
« Cant oïrent cel jor beneüré bondir :
« Gaudete, qu’il est né cil que fera fenir
« La pusance au Deable et les pecié tolir. »
« Sire, par notre vie voilistes mort sofrir,
« Sor le laing della crois faïtes acomplir
« Tote le profecie jusq’au pont dou transir :
« Si cum bien croi de voir le vostre suresir,
« Por la sainte pité qe vos fist devenir
« Home par notre amor e la mort englotir
« Et de sa grant pusance Lucifers desaysir,
« Aiés pité dou roi que ja me fist norir,
« De Oliver et des autres qe vos sunt a servir,
« Que Païn non lo poise verguncer ni onir,
« Et cest çamin me faites en tal gise fornir
« Que mielz me soit a l’arme par le vos loi emplir
« E onor n’ait sainte Glise, qe devons mantenir. »
Larmoiant s’est seigné, pué est alé gesir.