| ◄ Laisse DXVIII | Laisse DXIX | Laisse DXX ► |
Quant Soldan s’est asis, en estant se leva
Pelias, qi estoit niés Malqidant, e dit a :
« Machomet ce ne dong, q’en loi nos estora,
« Qe honi soit mon oncle por teil gient con voi ca.
« Entendés, roi de Perse, que une feme chaca
« Adan dou Paradis, quant il por li peca.
« Quant le plus sage home c’onque fu ni sera
« As dis de une fame engigner se leisa,
« Dun n’est il mereveille se fames engigna
« Lot e Sanson le fort, que une bestosa ;
« Davi e Salomon en lor croir araja.
« De l’ome ne vos di que il bien encontra ;
« Je di que tut le mal qu’avient ni avenra,
« La feme en est chief, e ja coupe n’i a ;
« Mais qui lor done oÿe, chier le comperera.
« Por la file le roi le di, que je voi ja
« Qu’est ouvre e comencere d’un mal que devira.
« Dehé ait de ma part qi ja l’an blasmera.
« Ele feit ce que doit, e qant autre fera,
« Li seigles ert finis, plus jor non durera.
« Neporqant, se je puis, le non s’en vantera,
« Car maintenant ert arse, son per l’outroiera,
« Ne pués le roi, mon oncle, plus nel desamera,
« E no ert mute gere e nus home en mora.
« Prover veul por batalie a chi m’en desdira
« Qe ele est digne de mort e deservie l’a :
« Qi comuet omicide, mort soit, dit Seneca.
« Responde moi qi veult, qe ci me trovera. »
Tot irei s’est asis, e Rolant ariva.