| ◄ Laisse DXV | Laisse DXVI | Laisse DXVII ► |
Dedans le tref ou l’amirant estoit
Mena Rolant cil qi le condusoit.
Trovent Soldan q’en ses barons seoit ;
Asez i orent Paiens et Parengoit,
Rois e prences e dus a un consoil destroit.
D’uns jujemans q’il font grant tençons i oit,
Car une file le roi de Perse avoit,
Belle e cortoise e molt de bon endroit ;
Non avoit qe .xv. ains, et son per la voloit
Marïer a uns rois qi ele riens n’amoit.
Le pere a plus d’un an promise la li oit,
Mais mout par estoit viel e la cars foible oit.
La jantis damoisele, qant davant lé le voit,
Oiant tot le bernaje, refusés le avoit :
Dit qe mari ne veut, dont cil grant onte en oit.
Ces jounes bachelers s’an gabent en recoit
E disoient entr’aus : « Par Mahon, elle a droit,
« Car plus belle pulcele ne menjue ni boit,
« E tort a cist veiars ; qe soie maleoit
« Qi cesti li donast q’en amor vient e croit ! »
Qant le viel l’a oï, forment grant onte en oit ;
En sun cors s’est pansié comant il le feroit.
En estant est levei e jure quant il croit,
S’ele eüst en douaire plus qe Cesars onc oit,
Soulemant por soignant dist q’il ne la prendroit :
« Les diz que ele a fait a mervoile me ploit :
« Je l’an ferai ardoir ains ch’un mois compli soit. »