Comment Diex fourma Adam (ms. 25566 de la BnF)
Comment Diex fourma Adam
Nostres Sire cria au commenchement le chiel et le terre et toutes les autres creatures et quant il ot tout che fait dont primes mist il main a l’home lequel il fist de .viii. choses. La premiere chose du limon de le terre. La second de le mer. La tierche du soleil. La quarte des nues de soleil. La quinte du vent. La siste des pierres de le terre. La septime du Saint Esperit. Et li uoitisme de le clarté du monde. La premiere partie que nous disons qui fu du limon de le terre che est chele dont li chars fu. La seconde qui fu de le mer fu li sans. La tierche qui fu du soleil furent li oeil. La quart qui fu des nues furent les pensees. La quinte qui fu du vent fu li alaine. La siste qui fu des pierres furent li os. La septime partie que nous disons qui fu du Saint Esperit, che est chele qui mise est en chascun homme. La witime partie qui i est che fu de la clarté du monde. Et chele clartés senefie Crist.
S’il i a plus de limon de le terre, il sera precheus en toutes manieres. S’il i a plus de la mer il sera sages. S’il i a plus de soleil il sera biaus. Et s’il i a plus de nues il sera pensis. S’il y a plus du vent il ert ireus. S’il i a plus des pierres il iert durs et avers et lerres. S’il i a plus de le partie du Saint Esperit il ser biaus et batilleus et raemplis de le divine escripture. Et s’il i a de le clarté du monde il sera biaus et amés.
Quant Nostre Sires ot Adam fourmé ensi que vous avés oi, et de teus coses s’i n’ot point de non, dont apela Nostre Sire .iiii. arçangles et leur dist qu’il alassent querre non a tel home.
Sains Mikiex ala en orient et vit une estoile qui avoit non Anatolini si en prist le premiere lettre che fu .A. Et le porta devant Nostre Seigneur.
Gabriaus ala en ocident et vit une estoile qui avoit non Dissi dont il aporta devant Nostre Seigneur le premiere lettre .D.
Raphael ala en Aquilon et i vit une autre estoile qui avoit a non Atyicus s’en aporta le premiere lettre avoec soi, che fu .A.
Uriel ala en Merediem et i vit une estoile qui avoit a non Musibrien si em aporta une lettre le premiere che fu .M.
Dont furent les .iiii. lettres mises ensanle. Et Nostre Sires dit a Uriel leust ches lettres. Et Uriel dist Adam. Et Nostre Sires dist que ensi seroit chis home apelés.
Explicit comment Diex fourma Adam.