Les Œuvres de François Rabelais (Éditions Marty-Laveaux)/Gargantua/56
Comment estoient vestuz les religieux et religieuses de Theleme.
Chapitre LVI.
es dames, au commencement de la fondation, se habilloient à leur plaisir et arbitre. Depuis, feurent reforméez par leur franc vouloir en la façon que s’ensuyt.
Elles portoient chausses d’escarlatte, ou de migraine et passoient lesdictes chausses le genoul au dessus par troys doigtz justement, et ceste liziere estoit de quelque belles broderies et descoupeures. Les jartieres estoient de la couleur de leurs bracelletz, et comprenoient le genoul au dessus et dessoubz. Les souliers, escarpins et pantoufles de velours cramoysi rouge ou violet, deschiquettées à barbe d’escrevisse.
Au dessus de la chemise vestoient la belle vasquine de quelque beau camelot de soye. Sus icelle vestoient la verdugale de tafetas blanc, rouge, tanné, grys, etc., au dessus la cotte de tafetas d’argent faict à broderies de fin or et à l’agueille entortillé, ou, selon que bon leur sembloit, et correspondent à la disposition de l’air, de satin, damas, velours orangé, tanné, verd, cendré, bleu, jaune clair, rouge cramoysi, blanc, drap d’or, toille d’argent, de canetille, de brodure, selon les festes.
Les robbes, selon la saison, de toille d’or à frizure d’argent, de satin rouge couvert de canetille d’or, de tafetas blanc, bleu, noir, tanné, sarge de soye, camelot de soye, velours, drap d’argent, toille d’argent, or traict, velours ou satin porfilé d’or en diverses protraictures.
En esté, quelques jours, en lieu de robbes portoient belles marlottes, des parures susdictes, ou quelques bernes à la moresque, de velours violet à frizure d’or sus canetille d’argent, ou à cordelieres d’or, guarnies aux rencontres de petites perles Indicques. Et tousjours le beau panache, scelon les couleurs des manchons, et bien guarny de papillettes. En hyver, robbes de tafetas des couleurs comme dessus, fourrées de loups cerviers, genettes noires, martres de Calabre, zibelines, et aultres fourrures precieuses.
Les patenostres, anneauls, jazerans, carcans, estoient de fines pierreries, escarboucles, rubys balays, diamans, saphiz, esmeraudes, turquoyses, grenatz, agathes, berilles, perles, et unions d’excellence.
L’acoustrement de la teste estoit selon le temps. En hyver à la mode Françoyse ; au printemps à l’Espagnole ; en esté à la Tusque, exceptez les festes et dimanches, esquelz portoient accoustrement Françoys, parce qu’il est plus honorable et mieulx sent la pudicité matronale.
Les hommes estoient habilléz à leur mode : chausses, pour le bas, d’estamet ou serge drapée, d’escarlatte, de migraine, blanc ou noir ; les hault de velours d’icelles couleurs, ou bien près approchantes, brodées et deschiquetées selon leur invention ; le pourpoint de drap d’or, d’argent, de velours, satin, damas, tafetas, de mesmes couleurs, deschiquettés, broudez et acoustrez en paragon ; les aguillettes, de soye de mesmes couleurs ; les fers d’or bien esmaillez ; les sayes et chamarres de drap d’or, toille d’or, drap d’argent, velours porfilé à plaisir ; les robbes autant precieuses comme des dames ; les ceinctures de soye, des couleurs du pourpoint ; chascun la belle espée au cousté, la poignée dorée, le fourreau de velours de la couleur des chausses, le bout d’or et de orfevrerie ; le poignart de mesmes ; le bonnet de velours noir, garny de force bagues et boutons d’or ; la plume blanche par dessus, mignonnement partie à paillettes d’or, au bout desquelles pendoient en papillettes beaulx rubiz, esmeraudes, etc.
Mais telle sympathie estoit entre les hommes et les femmes que par chascun jour ils estoient vestuz de semblable parure, et pour à ce ne faillir, estoient certains gentilz hommes ordonnez pour dire es hommes, par chascun matin, quelle livrée les dames vouloient en icelle journée porter, car le tout estoit faict selon l’arbitre des dames.
En ces vestemens tant propres et accoustremens tant riches ne pensez que eulx ny elles perdissent temps aulcun, car les maistres des garderobbes avoient toute la vesture tant preste par chascun matin, et les dames de chambre tant bien estoient aprinses que en un moment elles estoient prestes et habillez de pied en cap. Et, pour iceulx acoustremens avoir en meilleur oportunité, au tour du boys de Theleme estoit un grand corps de maison long de demye lieue, bien clair et assorty, en laquelle demouroient les orfevres, lapidaires, brodeurs, tailleurs, tireurs d’or, veloutiers, tapissiers, et aultelissiers, et là œuvroient chascun de son mestier, et le tout pour les susdictz religieux et religieuses. Iceulx estoient fourniz de matiere et estoffe par les mains du seigneur Nausiclete, lequel par chascun an leurs rendoit sept navires des isles de Perlas et Canibales, chargées de lingotz d’or, de soye crue, de perles et pierreries. Si quelques unions tendoient à vetusté et changeoient de naïfve blancheur, icelles par leur art renouvelloient en les donnant à manger à quelques beaulx cocqs, comme on baille cure es faulcons.