Iconologie (Cesare Ripa, 1643)/I/Eſperance

La bibliothèque libre.


Esperance. LII.

Sa vraye Image eſt celle d’vne ieune Dame, veſtuë de verd, couronnée d’vne Guirlande de Fleurs, & qui tient entre ſes bras vn petit Amour, à qui elle donne la mamelle.

Sa Guirlande de Fleurs eſt vn vray ſymbole de l’Eſperance ; pource, Qu’elles ne paroiſſent iamais ſur l’arbre, qu’en meſme temps elles ne nous facent eſperer du fruict.

Quant à l’Amour qu’elle allaicte, cela veut dire, Que l’vn ſans l’autre peuuent eſtre difficilement de longue durée. Car comme on ne ſouhaite iamais d’auoir du mal, il s’enſuit de là, que l’homme n’aſpire qu’au bien, s’il eſt ainſi que durant ſa vie, il ſe propoſe touſiours pour guides la Nature & la Raiſon. Or eſt-il que comme le bien n’eſt pas difficile à connoiſtre ; Il nous eſmeut auſſi facilement à l’aimer, & à nous en promettre la poſſeſſion : Ce qui fait dire à ſainct Auguſtin, In Pſal. 104. Que l’amour ſans l’Eſperance, ne peut iamais venir à bout de ſes deſirs.

Quelques autres l’habillent d’vne robe iaune, toute ſemée de fleurs, à cauſe qu’elle reſueille & entretient dans nos ames mille deſirs qui leur plaiſent ; Tout de meſme que l’Aurore, de qui elle porte les couleurs, & à laquelle les Atheniens la comparent, ſe faiſant paroiſtre ſur l’Orizon, renouuelle toutes choſes auecque le iour, & nous fait eſperer de plus en plus, par la diuersité des agreables objets qu’elle preſente à nos yeux, l’adiouſte à cecy, Que de la façon qu’ils en plantent la figure, il ſemble qu’elle marche ſur la pointe des pieds ; par où ils veulent monſtrer ſans doute, Que l’Eſperance n’eſt iamais bien ferme, & que les choſes que nous deſirons, nous ſemblent touſiours plus grandes que celles que nous auons.