Iconologie (Cesare Ripa, 1643)/I/Agriculture
Agricvltvre. VIII.
Evx qui s’eſtudient à peindre l’Agricultre, luy
font d’ordinaire vn viſage champeſtre, mais qui
n’en eſt pas moins agreable, tel que celuy de la
Deeſſe Cerés. Ils luy donnent pour habillement
vne robe verte, & la couronnent d’vne guirlande d’eſpics.
Auecque cela ils luy font tenir de la main gauche la figure du
Zodiaque, & de la droite vn Arbriſſeau, qu’elle regarde fixement,
pource qu’il commence à fleurir, outre qu’à ſes pieds eſt
remarquable le coultre d’vne charruë.
Par ſa robe verte eſt ſignifiée l’Eſperance, ſans laquelle il ne ſe trouueroit iamais perſonne qui vouluſt s’employer à labouerer ny à cultiuer la terre.
La Couronne d’eſpics luy eſt donnée auecque raiſon, comme principale fin de cét Art, qui eſt de faire multiplier les grains pour la nourriture des hommes.
Par l’Arbre fleury ſur qui elle porte ſa main & ſes yeux, eſt denotée l’amour extreme du Laboureur enuers ſes Plantes, qui pour recompenſe du ſoin qu’il en a, luy promettent des fruicts, en ſuitte des fleurs qu’elles eſtalent.
Les douze Signes du Zodiaque marquent la diuerſité du temps & des ſaiſons de l’année ; à quoy le Laboureur doit prendre garde ſur toutes choſes.
Quant au coultre de la charruë, ce n’eſt pas ſans raiſon qu’il eſt mis au bas de cette peinture, pour eſtre l’outil le plus neceſſaire au labourage.
Ie rapporteray à ce propos qu’il ſe treuue des Medailles de l’Empereur Gordian, au reuers deſquelles le ſoin de l’Agriculture eſt repreſenté par vne Femme qui des deux bras qu’elle eſtend monſtre vn Lyon & vn Taureau couchez à ſes pieds ; Où il faut remarquer que le Lyon ſe prend icy pour la terre, comme conſacré qu’il eſt à la Deeſſe Cybele, & le Taureau pour le labourage, à cauſe que cét animal infatigable y eſt extremement propre.