Iconologie (Cesare Ripa, 1643)/I/Bonté
Bonte. XXIII.
Ette Nymphe, ou pluſtoſt cette Deeſſe, veſtuë
d’vne robe de gaze d’or, & couronnée d’vne guirlande
de Ruë, a les yeux fixes au Ciel, vn Pelican
entre ſes bras, & à ſes coſtez un Arbre verdoyant,
planté ſur le bord d’vne riuiere.
La Bonté en l’homme eſt vn meſlange de pluſieurs bonnes qualitez, comme celles-cy ; la Foy, la Iuſtice, l’integrité, la patience, & ainſi des autres.
Sa robe eſt tiſſuë d’or, à cauſe que c’eſt le meilleur de tous les metaux : Et pour la meſme raiſon encore le Poëte Horace donne à la mediocrité l’epithete de dorée, pource qu’il eſt veritable que par ſon moyen la Bonté ſe communique à toutes les choſes d’icy bas.
Sa Guirlande faite de Ruë, monſtre qu’elle n’a pas moins de force à exterminer les mauuaiſes penſées, qui luy font ſans ceſſe la guerre, que cette Herbe a de vertu contre les enchantemens & les charmes des malins eſprits, qui la fuyent naturellement, & l’ont en horreur. Dauantage, comme ce n’eſt pas la moindre de ſes qualitez que d’eſteindre peu à peu l’amour prophane ; la vraye Bonté de meſme a cela de propre, de fouler aux pieds tous ſes intereſts, & d’aſſuiettir à la raiſon l’amour de ſoy-meſme, qui trouble ordinairement l’harmonie des autres Vertus.
Elle tourne les yeux vers le Ciel, pour ne voir point les vanitez de la terre. Car les objets de baſſeſſe & de fragilité ne luy ſont pas moins odieux, que la contemplation de choſes diuines luy eſt agreable.
Le Pelican qu’elle tient entre ſes bras, eſt vne figure de ſon ardente Charité ; Car elle retranche de ſa propre nourriture, pour en faire part aux pauures ; à l’imitation de cét oyſeau ſecourable, qui pour empeſcher que ſes petits ne meurent de faim, ſe perce le flanc à coups de bec, & les nourrit du ſang qu’il en fait ſortir.
L’Arbre qu’on a peint prés d’elle a vn ſens allegorique & myſterieux, Pſal. I tiré des termes exprés du Royal Prophete, lors que parlant de l’Homme iuſte & qui ſuit la Loy de Dieu, il le compare à vn arbre qu’on a planté ſur le bord d’vn clair ruiſſeau.