Iconologie (Cesare Ripa, 1643)/I/Chasteté
Chasteté. XXV.
Il n’y euſt iamais de beauté plus grande ny plus modeſte que celle-cy. Elle tient vn foüet d’vne main, & de l’autre vn crible, d’où il s’eſcoule de l’eau. Sa robe blanche reſſemble à peu prés à celle d’vne Veſtalle ; ſur la ceinture de laquelle, qui eſt en forme de bande aſſez large, ſont eſcrits ces mots tirez de S. Paul, Caſtigo corpus meum, c’eſt à dire, Ie chaſtie mon corps ; Et à ſes pieds ſe void vn Cupidon vaincu, auecque les yeux bandez, & l’arc tout rompu.
Cette Figure de la Chaſteté ne peut mieux eſtre expliquée que par la definition qu’en donne le grand Sainct Thomas, In 2.2. 141. att. quand il dit, Qu’vne ſi belle Vertu, qui prend ſon nom du chaſtiment de la chair, purifie la perſonne qui la poſſede, & la nettoye de toute ſorte d’impuretez & d’ordures.
Elle tient pour cét effet vne diſcipline, dont elle chaſtie ſon corps, qui eſt la deuiſe eſcrite ſur ſa ceinture.
Par le crible qu’elle porte, il eſt demonſtré, Que l’eau qu’on y reſpand n’en ſort pas plus promptement, que les mauuaiſes penſées s’eſcoulent viſte de ſon ame ; Et par le Cupidon qu’elle foule aux pieds ſe void clairement, Que la Concupiſcence, quelque forte qu’on ſe la figure, ne peut auoir aucun empire sur elle.
A cette Peinture de la Chaſteté l’on en peut adjouſter vne autre, qui la repreſente veſtuë de blanc, ſelon Tibulle, Lib. 2. Ep. 1.
Pource que les Dieux immortels,
Qui ſont ennemis des ordures,
N’ayment à voir ſur leurs Autels,
Que des choſes chaſtes & pures.
Son viſage eſt voilé, à cauſe, dit S. Gregoire, que c’eſt le propre des ames pudiques d’empeſcher ſoigneuſement que le vice n’entre chez elles par les yeux, & de les deſtourner pour cét effet des objets deshonneſtes.
Le Sceptre qu’on luy fait tenir, ſignifie que l’homme chaſte a tant de pouuoir ſur ſoy, qu’encore que la chair ſoit mortelle ennemie de l’eſprit, elle ne peut neantmoins le vaincre, s’il lui reſiſte.
C’eſt pour la meſme raiſon encore, que la Chaſteté ſemble marcher icy, de la façon qu’elle eſt peinte ; afin de monſtrer à ceux qui la cheriſſent, combien il leur importe de tenir l’ame en action, & de ne point s’auilir dans le vice des feineants, qui eſt la ſource de tous les maux de la vie. Mais il l’eſt ſur tout de la plus ardente de toutes les paſſions, puis qu’aſſeurément, Ouid. med. am.
Cupidon n’a point d’arc, point de traits, point de flame,
Pour celuy qui bannit l’oiſiueté de l’ame.
Pier. 22 Quant aux Tourtourelles, ie trouue qu’elles conuiennent fort bien à la Vertu que nous deſcriuons, dont cét oyſeau eſt à bon droit le ſymbole ; pource qu’ayant vne fois perdu ſa compagne, il n’en veut point auoir d’autre, & qu’il paſſe le reſte de ſa vie dans vne ſolitude continuelle.