Iconologie (Cesare Ripa, 1643)/I/Mariage
Mariage. XCII.
L ne peut mieux eſtre dépeint que par le portrait
de cette Femme richement veſtuë, ayant ſur le col
vn Ioug, vn Coin en vne main, des Entraues aux
pieds, & vne Vipere au deſſous.
Par les Entraues, & par le Ioug, il eſt demonſtré, Que le Mariage eſt vn aſſez peſant fardeau pour les forces de l’homme, qui ſe vend ſoy-meſme, ſe priuant de liberté, pour s’obliger à vne loy perpetuelle, & ſe ſoubmettre le plus ſouuent aux caprices d’vne femme. Auecque tout cela neantmoins, il ne laiſſe pas d’eſtre deſirable, pour pluſieurs conſiderations, & particulierement pour celle d’auoir des enfans, qui pour l’vtilité publique ſuccedent aux biens & aux vertus de leurs peres.
On luy met vn Coin à la main, d’autant que par l’expreſſe ordonnance de Solon, anciennement on preſentoit ce fruict dans Athenes à ceux qui eſtoient nouuellement mariez. Auſſi eſt-il, ſelon Pierius, vn ſymbole de fecondité & d’amour reciproque, comme il ſe remarque en pluſieurs Medailles, où l’on le fait porter au ieune Hymenée.
Quant à la Vipere, qui eſt ſous les pieds de cette Eſpouſe, cela monſtre, Qu’il faut qu’vne femme d’honneur foule aux pieds toute ſorte de penſées indignes d’elle, & qui choquent tant ſoit peu la foy promiſe à ſon mary, ne faiſant pas comme la Vipere, qui par vn excez de volupté brutale tuë le Serpent, dans les embraſſements duquel elle eſt enlacée.