Iconologie (Cesare Ripa, 1643)/I/Modeſtie
Modestie. CII.
Ette Vierge veſtuë de blanc, & coiffée d’vn ſimple
couure-chef, ſans auoir autre ornement qu’vne
ceinture d’or, tient la teſte baiſſée, & vn Sceptre
myſterieux à la main, auec vn œil au deſſus.
La Modeſtie, qui conſiſte principalement à fuir les extremitez, & à ſe tenir dans vn iuſte milieu, eſt ſimplement coiffée, & veſtuë d’vne robe blanche, pource qu’elle ſe contente de peu, & que fuyant tous excez, elle n’a rien de ſi cher, que de conſeruer dans vne vraye moderation la pureté de ſon ame.
Cela nous eſt figuré par ſa ceinture d’or, que l’Apoſtre nous conſeille de prendre, c’eſt à dire, ſelon Eutymius, de mettre à la chaiſne nos paſſions deſreglées, & nos laſciues concupiſcences ; A quoy l’on ne peut mieux paruenir, que par vne vertueuſe Modeſtie, & vne pure ſincerité de cœur.
Elle donne des preuues de tous les deux par ſon action poſée, & par l’humilité de ſes yeux qu’elle panche en bas à l’imitation des honneſtes filles, & des deuotes Religieuſes, monſtrent veritablement, combien elles ſont ſoigneuſes d’obeïr à ce precepte de S. Paul, Que voſtre Modeſtie ſoit manifeſtée à tous les hommes.
Le Sceptre, auec vn œil au bout, eſt vn Hieroglyphe de cette Vertu, ainſi repreſentée par les Preſtres Egyptiens. Auſſi eſt-il vray, que celuy qui la poſſede a les yeux de l’ame aſſez clair-voyans, pour s’empeſcher de tomber dans le precipice ; & aſſez d’Empire ſur ſes paſſions, pour les aſſujetir au Sceptre de la raiſon. Par où l’on peut voir, que la principale fin de l’homme modeſte ſe rapporte à la moderation de ſoy-meſme.
Or comme il n’eſt pas incompatible que les Vertus hors de leurs bornes ne deuiennent vices, puis qu’il ſe void par eſpreuue, que la vaillance degenere en humeur brutale, la largeſſe en Prodigalité, & la Deuotion en Hyprocriſie, quand il y a de l’excez. Il ſe peut faire de meſme qu’vne trop grande Modeſtie paſſe quelquesfois pour laſcheté dans le monde ; ce qui arriue la pluſpart du temps, lors que l’homme s’aneantit par maniere de dire, à force de ne ſe connoiſtre pas, & de n’oſer entreprendre ce dequoy il pourroit venir à bout, s’il auoit vn peu meilleure opinion de soy-meſme : Tellement qu’il ne faut pas s’eſtonner ſi quelques anciens Mythologiſtes ont repreſenté cette ſorte de molleſſe par vne Femme nonchalante, eſcheuelée, mal veſtuë, & couchée par terre. Auſſi eſt-il vray que les femmes, à cauſe de la foibleſſe de leur ſexe, ſont d’ordinaire plus laſches que les hommes, quand il eſt queſtion d’executer quelques deſſeins d’importance.