Iconologie (Cesare Ripa, 1643)/I/Nobleſſe

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 121-128).

Noblesse. CVII.

ELle eſt icy peinte en habit long, comme elle ſe void en la Medaille de Geta, où elle tient vne Lance d’vne main, & de l’autre vne petite Image de Minerue, auec deux Couronnes en bas. Par la robe longue, que les ſeuls Gentils-hommes pouuoient porter au temps des Romains, il eſt demonſtré, Que la grauité des mœurs eſt bien-ſeante aux perſonnes nobles ; Par la Lance jointe à l’Image de Minerue, Que les Sciences & les Armes ennobliſſent l’homme ; Et par les deux Couronnes, Que les biens du corps, & ceux de l’ame y contribuent entierement : à quoy ſert beaucoup, ſelon les Poëtes, la Deeſſe Pallas, pour eſtre née du cerueau de Iupiter : ce qui doit s’entendre myſtiquement du diſcours, & de l’intellect, par le moyen deſquels on peut ſe mettre en eſtime, & s’acquerir les qualitez qui ſont neceſſaires à la vraye Nobleſſe.

D’autres la peignent auec vne Eſtoille ſur la teſte, & vn Sceptre en main, pour donner à connoiſtre, Que la Nobleſſe naiſt de la vertu d’vn courage illuſtre ; & qu’elle ſe conſerue facilement par le moyen des Richeſſes.