Iconologie (Cesare Ripa, 1643)/I/Sapience

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 172-175).

Sapience. CXLVIII.

SA figure eſt celle d’vne ieune fille, qui dans l’obſcurité de la nuict tient de la main droite vne Lampe allumée, & de la gauche vn grand Liure.

On la peint ieune, pource qu’elle commande aux Aſtres, qui ne la peuuent faire vieillir, ny luy oſter l’intelligence qu’elle a des ſecrets de Dieu, qui ſont eternels.

La Lampe allumée ſignifie la lumiere de l’entendement, qui par vne particuliere grace de Dieu s’allume & s’entretient dans noſtre ame, ſans iamais diminuer : Car c’eſt par noſtre ſeule faute que l’entendement perd ſa propre clarté, en ſe laiſſant offuſquer par les tenebres du vice, qui ne peuuent donner lieu à la Sapience, mais enueloppent l’eſprit d’erreurs & de mauuaiſes penſées.

Quant au Liure qu’elle porte, c’eſt celuy des ſainctes Eſcritures, qui eſt le ſeul où l’on apprend la parfaite Sapience, & toutes les choſes qui ſont neceſſaires au ſalut.