Iconologie (Cesare Ripa, 1643)/I/Vertu

La bibliothèque libre.


Vertv. CLXVII.


CEtte ieune fille, qui ne paroiſt pas moins agreable que belle, eſt la vraye image de la Vertu ; qui a des Aiſles au dos, vne Picque en la main droite, en la gauche vne Couronne de Laurier, & vn Soleil au milieu de ſon beau ſein.

Elle eſt peinte ieune, pource qu’elle ne vieillit iamais, & ſe fortifie de iour en iour : car ſes actions illuſtres deuiennent des habitudes, & durent autant que la vie.

La beauté de ſon viſage eſt vn ſymbole de celle de ſon eſprit ; & c’eſt pour la meſme raiſon encore qu’on luy donne des Aiſles, pource qu’elle a cela de propre de s’eſleuer par deſſus le commun, pour prendre part à ces doux plaiſirs qui ne ſont gouſtez que des hommes extraordinaires.

Par le Soleil qu’elle a ſur le ſein, il eſt declaré, Que comme la lumiere de ce grand Aſtre nous vient du Ciel icy bas ; Ainſi la Vertu, qui a ſon ſiege dans le cœur, inſpire le mouuement & la vigueur à tout noſtre corps, que les Grecs appellent vn petit monde : De maniere que par cette Vertu ſecrette il ſe rechauffe de lumiere, de chaleur & de force, ſont ſelon les Philoſophes anciens, la meilleure partie des plaiſirs & des biens que nous pouuons gouſter en cette vie.

Et d’autant que le Laurier eſt toujours verd, & que la foudre ne le peut endommager, nous en donnons pour cét effet vne Couronne à la Vertu, pource qu’il n’eſt point d’ennemy qui la puiſſe vaincre, & qu’elle ne craint ny les embrazemens, ny les diſgraces, non plus que les autres violences de la fortune.

Pour le regard de la Picque qu’elle tient, comme parmy les Anciens elle eſtoit vne marque de preéminence & de dignité, elle en eſt vne auſſi du pouuoir de la Vertu, & des grands auantages qu’elle a ſur le vice.

Quelques anciens Empereurs l’ont ainſi donné à connoiſtre par les Medailles qu’ils en ont faites. En celle de Lucius Verus elle eſt repreſentée par le vaillant Bellerophon, monté ſur le Cheual Pegaſe, & armé d’vn Iauelot, dont il abat la Chimere, c’eſt à dire la deformité du vice : En celle d’Alexandre, par vne Femme armée, qui tient d’vne main vn Globe, & vne Lance de l’autre, pour monſtrer que la Vertu s’aſſujetit tout le monde ; Et en celle de Galba & de Domitian, par vne Amazone, qui a pour armes vn Corcelet auec vne Lance & vn Cimeterre, & ſous ſes pieds vn Morion.