| ◄ Laisse CCCCLXIX | Laisse CCCCLXX | Laisse CCCCLXXI ► |
Quant Oger le Denois a cele gient coisie,
Trepins en apella de Rens en Normandie,
Hestous et Anseïs le proz de Picardie ;
La gient qe vient lor mostre, qe il n’amoient mie :
Ce sunt les païsans qe por doner haÿe
Vienent a la citez qe ja stoit convertie.
« Seignor », ce dist Oger, « se me fetes complie
« De .vc. chevalers en ma conestablie
« E venez avec moi en nom de compagnie,
« Ceste gient qe sorvient font male cevaucie.
— Dehait », ce dist Hestous, « qi ce vos contralie !
« Tot primer i ferrai de ma spiee forbie. »
Atant se partirent la franche baronie
E sont mil chevalers qe lor foi ont plevie
De nun falir l’uns l’autre deci q’en la finie :
Grant amor se porterent et fine compeignie,
Ne porterent jameis l’uns l’autre nule envie
D’onor ne de richece ni d’autre menantie
Fors de seignor servir et feir chevalerie.