| ◄ Laisse CCCCXIV | Laisse CCCCXV | Laisse CCCCXVI ► |
Por devant porte Lice, au crever de l’aubor,
A pris Bernars l’escu e l’esplié frasenor ;
O lui aporte un cors a loi de venator.
Rollant en apella et lui dist : « Mon seignor,
« De toi me poise mout que estais en eror.
« Par Diex te pri, biau sire, ne te metre paor,
« Car tu ais bone gient et loial conductor.
« Se ancui ne te faiz disner sor celle tor,
« Fa moi morir de mort qe s’afeit a traitor.
« Je m’en irai avant, qe sui tes gïeor,
« A un cors de ceval a le porte Greignor.
« Le primer qe m’atent, par Diex le creator,
« Jameis de contredir a toi n’avra loisor.
« Mais quant oirais mon graille, aiez de moi tendror,
« Car al secors de moi trop non soie demor.
— Volantier », dist li quens, « a male mort e plor
« De toz nos anemis, et a bien et honor
« De Diex et sante Glixe et de l’ampereor. »
Adunc se part Bernars ardiz, plan de furor ;
A la porte s’aproce, au treir d’un arceor ;
En une maisons arse por feu et por calor
Un petit repuisa desor son misoudor,
Et prie Damediex, le roi superior,
Qe li dont a chief traire sa ovre et son labor.