L’entrée d’Espagne/Laisse CCCLXII

La bibliothèque libre.
◄   Laisse CCCLXI Laisse CCCLXII Laisse CCCLXIII   ►
CCCLXII[1]

8475Gaenes vient a l’estorme, nun s’aseiure gaire ;
A .xm. de ses homes vient Saracins forfaire,
Et a bailé s’ansaigne a son cosins Machaire.
Cristïens feit torner, qi sunt mis al repaire.
« Arier » feit il, « tornez, franche, gient de bon aire ;
8480« Ne füez de bataile por crïer ne por braire ;
« Pis de cestor feromes, par le cor sant Elaire,
« Que la gient Alexandre ne fist de cele Daire. »
Lors a brocé li cont desor son destrer vaire ;
De jostrer feit senblant envers il aversaire.
8485Mais nus ne s’en desflote, ans funt li arcers traire.
Cristïens covristrent des escuz lor visaire,
Streitemant se contienent, ja lor presse n’esclaire.
Synador en jura Mahomet, son Deu paire :
« Geroier d’arceors a çascuns puet desplaire ».
8490Adunc feit li arcer trestut a une part traire.
Or avront biaus leisir cels qi le voldrunt faire
D’esagier lor proeces avant q’il s’en repaire.


◄   Laisse CCCLXI Laisse CCCLXII Laisse CCCLXIII   ►
  1. — 8475 Saenes — 8484 auersare — 8486 conustrẽt — 8487 contient.