| ◄ Laisse DCLVII | Laisse DCLVIII | Laisse DCLIX ► |
Le ber garde in la roche, qi asés iert prochaine ;
Un sercul vi overt, dunt la piere fu saine ;
Entor i oit de candoiles ardant une qincaine.
L’ermite li choucha o tot l’espee vaine ;
Puis est la piere cluse en la roche anciaine ;
Dou cors ni dou sercuel ne vit pués rien certaine.
Rolant se fist le signe qe trova sainte Elaine ;
De le hermitaje insi proiant la Madalaine
Qe ancué le remaint a son sir Carlemaine.
Ja estoit il crevee l’aube qi fu prochaine ;
Le cheval, qant le vit, por poi ne se desfraine,
A honir comença contre son chevetaine,
Bien mostra q’il avoit eü fain et avaine.
Mout est joians le duch qil voit de tele alaine ;
Bellemant i est monté, pués descend en la plaine.
L’angle s’en est alei, qi delés la fontaine
Avoit leisiés dormant li dui en tele straine
Qu’il n’avoient regard de creature humaine.