| ◄ Laisse DCLX | Laisse DCLXI | Laisse DCLXII ► |
Si tost con le cheval dou guaut fiert la frontere,
Si i ovri une voie mout large e mout pleneire ;
A bien terz doi e plus i a aute la poudriere ;
De .cc. ans passés senbloit ancionere.
Si con il vont avant la veoient entiere,
E, qant il arestoient por aucune maniere,
Ne verent fors que bois devant els ni darere,
Les grant arbres entor els e le grant foillere.
Rolant retent le bai por la rene d’or chiere.
« Hues », dist il, « or dites, et vos, Sanson, biau frere
« Ou devons nos aler, cant la voie premere
« Avons ensi perdue ? Dites, qe devons fere ?
— Je ne sai, sir » dit Sanses, « car non sui costumere
« De veoir tel merveille c’onqes no vi tant fiere,
« Q’avons perdue la voie con renart la livrere.
« D’une part voi desers e de l’autre, rochere ;
« Ancoi vodroie estre prés la fontane cleire,
« E le pomer fust teus cun dou premer afere.
— Se ce fust verités », dist Hue, « por Saint Piere,
« Je remandroie en pés et en ost l’amperere,
« Que mais non partiroit d’iluech le fil ma mere. »
Adonch l’a regardés Rolant par mi la chiere.
« Ces paroles », dist il, « insent de male espere. »