◄ Laisse DCLXIX | Laisse DCLXX | Laisse DCLXXI ► |
DCLXX[1]
Che Rolant est venus e Hues, le fil Mart ;
Des host s’en essirent e joven e vellart
E lasserent bolir lor tripes e lor çart,
Armés et desarmés, e chevalier e gart.
Li dis de doze piers s’en issent ou Girart,
Salamon e quens Hues dou Mans et dan Riçart ;
Tant a proié Namon nostre roy de Montmart
Ch’el sen alla monter sor un destrer liart ;
Gondelbués e dus Naime e le bon Dasnemart
Des lices sunt ensu e furent li plus tart,
Car cil davant corent a guise de liopart.
Rainer est descendus del cival, a soi quart ;
Encontre li est venus le niés al duc Bernart.
Por davant s’engenoille al duc al cors gailart ;
Le cuer en oit si tendre che de parler fu tart,
Més celui le redrece, che n’oit pont de resgart.