◄ Laisse DCVII | Laisse DCVIII | Laisse DCIX ► |
« Doux fiuz », ce dit la mer, qant ele en soi revin,
« De ce qe jou dirai nus hon m’an port ahin,
« La vestre desevree por tant me maine a fin.
« Celui qi vos en maine est dou nible quisin
« Qui ne garde por ren a prendre le poucin,
« N’a dolor de le cloche, qe il ne le rapin.
« Douz fiuz, por quoi alés ou les outremarin ?
« E si font grant pechié nul qi vos endoutrin.
« Vos ne nos leisés, fil, plus bon de vostre lin.
« Se vestre piere vient ou dereans termin,
« Qui retenra le reigne de Perse et son demin ?
« Le roi de Babiloine le avra en son saisin.
« Au niés au roi de Rome je ce proi et enclin :
« Se Diex te ramain onque devant le fil Pepin,
« No me fere morir por ensi feit engin.
« Lase moi mon enfant e prant son pois d’or fin. »
A ce qe Rolant veult respondre : « E tu le tin »,
Dit Sanses : « Mere douz, changié vestre latin,
« Que, por cil Sir por qi ai garpis Apollin,
« Se vos ne m’otroiés l’aler de cist kemin,
« Devant vos m’oncirai a cotel acerin.
« Ancor est il mon per joune, e vos aisin ;
« Deportés vos ensanble au soir et au matin,
« Fetes amosne grant, chanter messe e matin,
« A ce qe fil vos dont le maigne Roi divin.