◄ Laisse DLVII | Laisse DLVIII | Laisse DLIX ► |
Come senglers irés chant est feru,
Est le niés Karles vers Pellias venu,
Abrandissant le bons brant amullu,
Que mervoille est chant il non l’a runpu :
De soi venger non fu pas esperdu.
Chun il furent l’un prés l’autre inbatu,
Le Turch se paine d’atorner sun eschu ;
A ce atendoit, et Rollant l’a feru
De Durindart si sor son sun iaume agu
Que par pué n’est a le tere zaü.
L’eume et la cuife li detrence anbedu,
Une grant plaie lui fist au vis desu,
Le sang en raie decisque au prés erbu.
Al recovreir de l’autre chols que fu,
Crie Rollant : « Mort is et chunfundu ;
« Tun pecé hot tun orgoil abatu.
« Glotuns villains, hor m’ais assendisu ;
« Si chun je chroi, hor t’ai bien respondu.
« Por dir outraje non vint ome asolu
« Et les menaces senz ovres sunt perdu.
« Se non te claimes ja mantenant venchu,
« D’or in avant non ert reanzons plu. »
Lor done un saut, sovre i est choru ;
Feru l’aüst, cant cil chrie : « Se tu
« Aies merci chant is dou siegle insu,
« Done moi triege soul tant que entendu
« Havras ce qu’ai peinsé et manteü.
— Tost », dist Rollant ; « non soit termes tenu. »
Alor s’areste por entendre celu.