◄ Laisse DLXX | Laisse DLXXI | Laisse DLXXII ► |
De Charsidoine rois Clador se leva,
Uns amirans que a tuit jors ama
Tuit li preudomes et mout les honora ;
In cort sun sir volluntier le asauza.
« Soudain, Soudain », fait il, « qui desdira
« Ce que li josne votre filz dit nos ha,
« Un bons chunsoil loials refusera.
« S’il a cestu bien fait, qui glousera
« Le jentils homes ? Faisons le venir za,
« E je serai cil que li ofrira
« Dionés la belle, que hui sa per non ha :
« Au refuser, ou s’il la rezevra,
« O voille o non, zi se descovrira
« Se gentils home o zaitis l’enjendra. »
Ce dit Soudain : « Molt bons consoil zi a. »
Tot mantenant sun filz in apella,
Il et dos autres por le duc invoia.
Donc li niés Karle dedans la chanbre entra ;
Tuit sunt levés et li plus l’inclina,
E il le sallue, et aprés s’abaisa
Aprés Soudain ; et Clador comenza.