◄ Laisse DLXXVI | Laisse DLXXVII | Laisse DLXXVIII ► |
Le soir meiesme, si cun Trepins latine,
Le roi de Perse vait veoir la raïne.
Elle et sa fille in sa chanbres perrine
Se sehoient desor une cortine.
Le roi baise l’infant et lui encline,
Sa fame apele, si li dist sa cunvine :
« Qu’en dites vos, dame de franche ourine,
« Que avemes fait baillis de tere outremarine
« Cestui bons chevalers que vint ceste maitine ?
« Mes barons l’otroient, nuls non li porte aïne ;
« L’ons dit qu’il n’a sun per jusque au port de Mesine.
— Sire », ce dit la dame, « ce soit en boine strine.
« Voirement le croi home, et le cuer m’endevine,
« Par quoi vos anemis debasent et decline. »
Lor perole Dionés a le coulors rousine :
« Honorés le, sir pere, char a pué de termine
« Porois an li vehoir proece et grant ensine.
« J’ai veüz in mes ars que une stoile devine
« In bien de cest païs ancué mut e zamine ;
« En terz ans fait sun cors, et in le chart define.
« In Perse et in Surie n’ert la terre sanguine ;
« Dedens Jerusalem, sor la salle mabrine,
« Ert de vos animis la derers desipline ;
« Pués revenrois a joie in le reigne Persine,
« Tuit baignés d’une eve qe porte medecine :
« Ensi motre mes sors, mes non sai que destine.
« Se vos vorois, sir pere, avoir joie interine,
« Retenés Lionés a le voutre cherine,
« A lui dounés les armes, li vair et li ermine ;
« Gardés qu’en lui amer n’i ait nule volpine,
« Que ce seroit l’estoille que ancué mut e cemine
« Par qui serois doutez decisque en Salomine. »