| ◄ Laisse DXLII | Laisse DXLIII | Laisse DXLIV ► |
Qant fu armei Rolant, li qens honeste,
Dionés le garde ; a mervoile li pleste.
Une pulcelle touche de sa man destre ;
Cele i aporte une riche sorveste :
Coverte estoit de serpentine teste,
Et ert cescune ovree si par bon mestre
Qant vent i fiert, l’une vers l’autre breste.
La damoisele dist au duc q’il la veste ;
E il si fist maintenant, senz areste.
Dou trief issi, et le escüers l’apreste
Le bon destrer qi mout fu de grant estre,
Covert de paile d’un chier color celestre :
A aigles d’or estoit portreit a destre
E a grifons parfilei a senestre.
Les aubes furent d’une olifante beste
E frans e estriers d’un chier or de Tolestre.
Le destrer breit come lion campestre ;
Cil qi l’amaine n’avoit tant de poueste
Que il poüst rafraner sa robeste.
Mout li guencirent cele pulcelle jeste :
Plus le redoutent qe careau d’arballestre.