| ◄ Laisse DXVII | Laisse DXVIII | Laisse DXIX ► |
Dist l’amiré de Perse : « Entendés, sire roi :
« Comant me menaceç, se n’ai feit le por coi ?
« Je vos ai feit venir encui a bone foi
« Por doner vos ma file, que plus belle ne croi :
« Se ele a dite rien que vos tourt a anoi,
« Ce fu por un gaber : repantie l’an voi.
« Por la novele veine qe ele a en soi
« Li dovés pardoner et por amor de moi.
« Ele ne le voldroit, por la foi che vos doi,
« Avoir por nulle rien dit, paleis ni secroi.
« Sire, prenés la fant, qe je la vos outroi ;
« De mes meilors citei vos en doherai troi.
« E se pur la venjance volés, je l’an feroi,
« Q’en ma chartre iert jetee, o nul deduit non croi,
« E pués la ferai batre ceschuns jorns une foi
« De coroies tinant trosq’al sange vermoi.
« Nen do ge oncir ma file par un chatis foloi. »
Atant s’asist desor le paille bloi.