| ◄ Laisse DXXXIII | Laisse DXXXIV | Laisse DXXXV ► |
— Sir », dist le dus, « je n’ai nule paor :
« Le droiz avés, dont je me taing meilor. »
Dist la pulcelle : « Je sui le figisor :
« Se vos perdrés, cuite soie en un for. »
Rolant apelle le neveu l’Aumansor :
« Dun chevaler, ne feisons plus sejor.
« Ou aqités la file mon seignor
« E repantis soiés de vo foulor,
« Ou la bataille feisons sans nul demor. »
Pelias garde le niés l’anpereor,
Comant les manbres i respondent d’entor.
« Diva », feit il, « me seroit il honor
« Quant a fil d’oume qui viquist de labor
« Moi combatisse ne seul monstrasse hiror
« De qant menaces il feisist tut un jor ?
« Qant che dit ais pardon et plus ancor.
« Mais bien soit cert le roi Persianor
« Q’ancois q’il soient refloris li aubor,
« Asés voudroit de teil ou de meilor
« Come tu is a fuïr son pior.
« S’en tut son reigne remandra une tor
« Que non soit arse dou pié jusque desor,
« Murs abatus, bruslei citei et bor,
« Donc moi confonde le Diex superior.
« De toi di jé que, avant l’oscuror,
« Ferai te apendre a loi d’uns robeor ;
« Leise m’aler a prendre mes ator. »
Ce dit Rolant : « De si grant vanteor
« N’oï chanter nus home a jugleor.
« Alé vos en ; ja n’en fuirai des or ;
« Mais si me dit le cors et le volor
« Qe vos ferai encué une paor
« Q’en vostre vie non l’eüstes greignor. »