La Maniere de enter et planter en iardins

La maniere de enter
et planter en iardins

En ce petit livre peut on bien sçavoir comment l’en doit subtilement enter et plantes et faire en iardins plusieurs choses bien estranges et tresplaisant en pratiquant la doctrine du livre de pierre de croyssance.

Et premierement,

Pour enter bien subtilement une greffe a ung neu, et la tordes et ostes l’escorche et aussy le neu, et puis la mettez en ung gecton aussy gros comme la greffe est, et il se prendra.

Pour enter vigne sur vigne, on la doibt fendre comme une outre arbre et bouter la greffe en la fente et puis le estouper bien de cire et le lier.

Item, se ung arbre atent trop longuement a porter fruit, faictes ung trou d’une tayriere en la plus grosse tige de sa racyne sans la perce tout oultre, et au trou que fait aures, boutes y ung baston sec et puis pareillement le laisses au dessusdit trou, lequel soit tresbien estoupe de cire et la terre regettee sur la dicte racine, si portera celle annee.

Pour avoir pesches plus tost deux mois que les autres entes en franc meurier et en vigne.

Pour avoir des prunes tout au long de l’este et iusques a la toussains de mintes manieres, entez de l’un et de l’autre en grosse lier en franc meurier et en serisier.

Pour faire que mesles serises et pesches soient au menger bonnes comme espises, et qu’on les puisse garder iusques aux novelles, entez en franc meurier comme dessus est dit et a les enter mouilles les greffes en myel et y mettes ung peu de pouldre de bonnes espices. C’est assavoir de cloux de girosfle, de canelle et de gingembre.

Pour ung muscadel prenes ung fil de fer et le boutes en la mouelle de la plante du sep qui soit taille a trois yeulletz tant que la dicte mouelle soit tout de hors tyree, et puis emplisses le sep de pouldre de noix, mugguete et puis estoupez de cire tellement que eaue n’y puisse entrer, et ce que les troys gectons porteront raysins pour faire muscadet : Et pourra l’en enger en terre et planter et tout sera muscadet.

Pour faire que pommes et poires et autres fruits viennent sans fleurir, entes la greffe sur ung figuer.

Pour avoir pommes de blanc durel ou de rouvel et le chaistaignier bien tost et ausy bien tard tellement que iusques a la Toussains en aura sur l’arbre, et pour garder et faire durer le fruit iusques a deux ans, entez de richerter poyriers d’anguouisse et en coignier.

[…]^[1] bonnes a menger iusques a la Toussains entes sur ung franc meurier et pareillement sur saugier.

Pour avoir grosses mesles deux moys plus tost que les autres et que une en soit meilleure que les autres, entez en grosse liers et en franc meurier et a les entier mouilles les greffes en mieil.

Pour avoir poires de caillouel et de hastiveau bien tost et bien tard sur les arbres, entes en groselier pour les avoir tost et en arbre a peine pour les avoir tard ou sur perier d’anguoisse ou autre durable. Pour avoir mesles sans pierres et que elles deviennent doulces comme miel, entez les en erglantier et a les enter mouilles la greffe en miel.

Pour avoir poires d’angouisse ou de permain ou de sainct riple ung mois ou deux plus tost que les autres et qu’elles durent et soyent bonnes iusques aux nouvelles, entes les en coignier et en franc meurier.

Pour avoir franches meures bien tost et bien tard iusques a la Toussains, entes en perier de hastiveau ou en groselier pour les avoir tost et en meslier pour les avoir tard.

Pour garder poyres ung an prenes du sel delye bien sec et le metez avecques les poires en ung baril en telle maniere que l’une poire ne touche a l’autre, puis estoupez bien le baril et le mettez en lieu sec sy que le sel ne affranchisse.

Pour avoir moitie pommes et moitie poires, prenes deux greffes et les fendez et puis les ioingnes en mettant la moitie du greffe de la poire, et soit bien gardee que eaue n’y enter par la ioincture, et entes sur tel estoc que vous vouldres et puys vous aures moitie pomme et moitie poire.

Item, il fait bon enter trois ou quatre iours devant le croissant, car autant de iours qu’il y auroit eue vous auries ente devant le croissant autant de temps mettre l’arbre a porter son fruit.

Le iour du croissant ou lendemain ou le tiers iour, plantes.

Item, quant on plante et aussy quant on ente il fait bon dire ce qui sensuyt :

In nomine Patris et Filii et Spiritu Sancti. Amen. Crescite et multiplicamini et replete terram. Pater noster. Ave maria. Et ne nos… Sed libera… Domine exaudi. Et clamor Domino. Spiritus sancte Deus qui omni creaturæ crementum dedisti, concede quæsumus, ut hoc in nomine tuo plantamus aut instituimus, convalescat, crescat, multiplicet et fructificet, ut ad utilitatem fidelium proficiat. Per Dominum nostrum.

Pour faire mourir et destruire fromis qui sont a l’environ d’aucun arbre, il convient eschesilier et remouvoir la terre entour ledit arbre puis illec mettre grant quantite de suye de cheminee et tantost les fromis s’en yront ou se mourront. Item, autrement les peult on destruire et fault prendre la sieure dais de chesne et en mettre assez largement au pié de l’arbre et tous les fremis mourront a la premiere pluye qui viendra.

Pour avoir grosses noys, prunes et amendes, prenez quatre noiaulx des fruis dessusditz et les mettez en ung pot plain de terre ioignant l’un a l’autre le plus pres que pourres, puis faictes ung pertuys au fons du pot par lequel pertuys tout ce que les noiaulx getteront seront contrains a yssir, et par cette contrainte se assembleront l’un a l’autre tellement qu’ilz ne seront que ung seul arbre qui en son temps portera plus gros fruyt que les autres arbres de sa nature et condicion.

Item, pour faire que ung chesne ou ung autre arbre soyt vert aussy bien en yver comme en estez, prenez la greffe d’un chesne ou d’un autre arbre et l’etendez sur ung chou.

Item, quiconques veult edifier yarding, il les doibt edifier et faire en lieu moiste et doibt on fuir le vent de la mer.

Item, on peult planter sans racine tous arbres qui ont grant mouelle, si comme sont figuiers, coudres, francs meuriers, vignes et leurs semblables, et se doit faire depuis la my septembre iusques a la Toussains. Et autres arbres a racine doivent estre plantes es advens de Noel, ou tantost apres, pour ce que souventesfoys le temps y est moult froit.

Item, pour garder tous fruis de gelee et en bonnes couleur iusques aux nouveaulx, on les doibt cueullir par temps bel et sec et que la lune soit en decours par nuyt, les mettre en lieu bien sec et couvrir de menues pailles de forment. Et se le temps d’iver et froyt et fort dur, sy mettez du foing par dessus et puys le ostes au doulx temps et vostre fruyt sera bel et bien odorant.

Item, le premier iour de croissant, fait bon edifier planter et semer, ii, iii, iiii, v, vi, vii, viii, ix, x, xi, xii, xiii, xvii, xviii et es autres ne edifies point.

Pour avoir roses verdes entes les sur houssot.

Pour garder raisins tout aval, la prenes bien delye sablon, puis couchies raysins dessus puis les couvres de sablon. Si les garderes tout l’an.

Item, pour faire que le fruit d’un arbre quel qu’il soyt soit laxatif, faictes ung pertuisien la tige, ou en la maistresse racine, dudict arbre d’une grosse tariere non pas tout oultre, mais iusques dedens la mouelle bien avant, en emplistes le dit pertuis desene ou de ezule ou d’un turbich, lequel que vouldres des troys, qui toutes sont chose laxatives, et puis estoupes le pertuys de cire et de mousse tres bien sy que riens n’en puisse cheoir dehors et tout le fruyt dudit arbre sera de lors en avant laxatif.

Finis.

1. Ici la phrase fait probablement référence au sujet de la page, à savoir : les pommes et les poires. — Note Wikisource.