Le Livre des oraisons/VII
VII
O lumière, bieneuree Trinité, et principal unité. Acrois en moy foy. Acrois espérance. Acrois charité. Délivre moy, Sauveur, et me justifie o bieneuree Trinité, deslie les crismes, pardonne les péchiez. Giete hors les misères, oste les angoisses, regarde les tribulations, repette les adversités en donnant leure de ma petition misericordieusement me veuillez octroyer. Vien sires je te prie en moy par quoy ie soye enflammé en tamour de feu de vraye charité. Vien sires ie te pri en moy par quoy ie te sente dedans mon corps, la confession de ma bouche reçois à bon gré et motroye faire fruit parfait par quoy ie soye enflammé en tamour, et comme Moysen ton servant tu illumine de merveilleuse resplendeur ainsi mon corps et mon sens te plaise de illuminer. Donne loyers de ioye, donne dons de graces, delie liens de yre, assemble nous annistance de paix, enlumine mon cuer car autrement sires iay trop pechié devant toy, plaise toy doulz sires d’avoir patience en moy, et deslivre moy de maulx lesquels tousiours ausissent sur les gens. Mes iniquités, sires, sont multipliées sur toutes autres et ataignent iusques auls ciels, pardonne moy sires et incline sur moy ta miséricorde. Sire Diex appetisse de ci en avant mes péchiez en courage contrit, et en esprit de humanité soye receu et me fay selon ta grant miséricorde car n’est nulle confusion à ceulx qui ont esperance en toy. Il n’est nul autre Diex hors toy, car tu as cure de tous, pour ce es tu sires de tous. Sires ainsi que tu fus benigne et misericors à nos pères, ainsi te plaise de estre à moy, et convertis Sires ma tribulation en ioye. Si que vivant sire ie te puisse beneir.