Le Mespris de la vie et consolation contre la mort/« Quant il faut l’enterrer, l’homme avaricieus »
Le Mespris de la vie et consolation contre la mort
LV.
Quant il faut l’enterrer, l’homme avaricieus
Enterre son argent, & miserable pense
L'y retreuver encor si la mort le dispence
De revoir du Soleil les rayons gracieus :
Par dernier testament le fol ambicieus
Ordonne à son convoy une folle depence,
Faisant apres sa mort triumpher son offence,
Et survivre son vice à son cors vicieus :
Ne pouvant plus des piés aller à la cadence
L'impudicque paillard d'espaule, & teste dance
Et delaissé du vice, il ne le peut laisser.
O cerveaus obstinez, helas! est il possible
Que la condition de la chair corruptible
En pensant à la mort, ne vous puisse abaisser.