Les Chroniques de Sire Jean Froissart/Livre I, Partie II/Chapitre CCCXXXIX
CHAPITRE CCCXXXIX.
Ces nouvelles vinrent en Castille au roi Henry et aux barons du dit royaume, qui ahers et alliés à lui étoient de foi et de hommage, comment sa nièce avoit épousé le duc de Lancastre, et encore supposoit-on que sa mains-née sœur Isabel épouseroit le comte de Cantebruge, le dit duc retourné en Angleterre. Si fut plus pensif le dit roi Henry que devant, et mit son conseil ensemble. Si fut adonc conseillé qu’il envoyât grands messages devers le roi de France, et qui bien sçussent parler et remontrer son affaire, et qui de ce mariage étoit fout informé. À ce conseil et avis se tint le roi Henry ; et ordonna sages hommes et les plus authentiques de son royaume, pour aller en France. Si se mirent au chemin en grand arroy ; et firent tant par leurs journées qu’ils vinrent en la cité de Paris, où ils trouvèrent le roi, qui les reçut à grand’joie, ainsi que bien le sçut faire.
Entre le roi dessus dit et le conseil du roi Henry qui avoient procurations scellées, bonnes et justes, de faire, traiter et procéder en toutes choses au nom du roi leur seigneur, eut plusieurs parlemens, conseils et traités, secrets et autres, lesquels tournèrent à effet. Finablement en ce temps furent accordées, ordonnées et confirmées alliances et confédérations moult grandes, et jurées solennellement de toutes parties à tenir fermement et non briser, ni aller à l’encontre par aucune voie, que ces deux rois demeureroient en unité de paix, d’amour et d’alliance ; et jura adonc le roi de France ; en parole de roi, qu’il aideroit et conforteroit le roi de Castille en toutes ses besognes, et ne feroit paix ni accord aucunement au roi d’Angleterre que il ne fût mis dedans[1]. À ces traités, accords et alliances faire rendit grand’peine messire Bertran du Guesclin, qui moult aimoit le roi Henry.
Après toutes ces choses faites, confirmées et scellées, se départirent les ambassadeurs du roi et retournèrent en Espaigne, et trouvèrent leur seigneur à Léon en Espaigne, qui fut moult joyeux de leur revenue et de ce qu’ils avoient si bien exploité ; et se tint depuis, parmi ces alliances, le roi Henry plus assuré et conforté que devant.
- ↑ Ce nouveau traité ne fut sans doute qu’une confirmation de l’alliance offensive et défensive entre les deux couronnes, qui fut signé par Henry de Transtamare sous les murs de Tolède dont il faisait le siége, le 26 novembre 1369 et qui a été publié par Rymer.