Les Souspirs amoureux de F B de Verville 1589/Quand parlant avec vous je respire la vie
LIIII.
Quand parlant avec vous je respire la vie
De vos yeux mon Soleil, & d’un signal certain
Vous monstrez à mon cœur que vostre cœur humain,
Prend plaisir à l’ardeur dont mon ame est saisie.
Mon ame hors de moy heureusement ravie
Vit tandis que je meurs, & prise du bel hain
Qui tient à vos cheveux, je l'attens, mais en vain :
Car sans plus retourner, en vous elle s'oublie.
J'ay beau la r'appeller elle qui ne veut pas
Eslongner vos beautez, m'abandonne au trespas,
Et me fait desirer mon mal heur pour son aise.
Ainsi vivant en vous quand je suis mort en moy
Je desire à tousjours pourveu qu'il le vous plaise,
Suivre le bel arrest dont vous m'estes la loy.