Livre des faits du bon messire Jean le Maingre, dit Bouciquaut/Partie I/Chapitre I
PARTIE I.
CHAPITRE PREMIER.
Affin qu’il ne soit pas celé, mais sceu de tous ceulx qui ce présent livre verront et orront, par quel mouvement il a esté faict et mis sus, il est à savoir que plusieurs chevaliers de grand renom et gentils-hommes vaillans poursuivans le noble faict et hautesse des armes, lesquels ont congneu et hanté dès son enfance, de tels y a et encores font, le bon vaillant preux mareschal de qui nous parlons, et ses nobles ancestres, et esté avec lui en maintes nobles places et assemblées chevaleureuses, parquoy tant l’ont veu et esprouvé en toutes conditions qui à vaillant chevalier advisent, ont advisé que, affin que le temps advenir, si comme devant est dict, le nom et bien faict de si vaillant preud’homme ne soit péry, ains soit demeurant au monde avec les vivans par longue mémoire, et que les autres s’y puissent mirer, que bon seroit que certain livre de luy et de ses faicts fust faict. Et pour ce, comme il en soit bien digne, advisèrent personne propice à qui l’œuvre commirent et chargèrent, laquelle personne, pour l’authorité de luy et aussi d’iceulx nobles dignes de foy, ne contredit leur bon vouloir, ains promit, à l’aide de Dieu, l’accomplir au mieulx que faire le sauroit, selon la relation de leurs rapports, et sans rien du sien en parlant de luy adjouster ; et ainsi entreprist ce dict œuvre, après le tesmoingnage et le rapport d’iceulx, qui estre nommés ne veulent, affin que envieux ne deissent que aulcune flaterie leur feist dire.