Quant lui fu prés, si dist : « Or is oncis
« Par mon cheval dont tu m’ais deseisis,
« Mon fust trenchié, dont molt me taing de pis. »
Respont Rollant : « Tes Diex ne toi non pris. »
Monjoie crie e treit le brant forbis,
Ferir le veit come mautalentis,
Desoz son heume le consuet sor le pis,
Les mailes trence do blans obers terlis,
Mais ne puet fere que got de sang n’insis ;
E li Paiens refiert lui autresis.
La comença de dos grant capleïs,
Fere bataille, criz e grant tenceïs ;
O veille o nun, le duc Rollant desis
En plaine plaigne ensanble e l’Arabis.
Or sunt el plans li barons devalé
Par vive force, tant se sunt ahasté ;
La ont ensanble tiel çanbiaus comencé
Trenciez lor ont lor escu enbaré
E les obers en plesor part dané.
Mout voit Rollant le Paiens alené,
Mout l’a le jor penez e travaillé.
Si formant fu le Paiens abravé,
Tot ensemant cum home forsené
Remist el fuere le bon brant açaré.
Remambre soi, ou camp se est encliné ;
Iluec avoit de pieres grant planté,
Une en a prise, si s’est amont levé,
Rollant la treit par moult roiste ferté.
- ↑ — 2739 hahaste — 2743 aleue — 2749 plantee — 2751 rostie feide.
— 2725 dont tainqis deseisis — 2728 forbie — 2734 cãplois — 2735 grant tenois
