Puis fu soirene nuet quant il sont descendu
E montent ou palés qi ja Pilate fu.
Li quens Hue de Blois est a Rolant venu ;
A une part li treit, si a feit son chief nu :
« Sire, qant vos pleira, ce vos soit manteü,
« Nos en porons aler, car ou port de Baru
« Trovarons le dormon des hernois reienplu ;
« Une jornee a pueis a la mer, e non plu.
« L’estormant fu nez d’Acre e mout ame Jhesu ;
« Mout seit bien de la mer, car je ai entandu
« Qu’en cil mester a fere est veilart devenu.
« La vitaille de nos e des çevaus crenu
« Li ai fete aporter a les sergians menu. »
Quant ce oï Rolant, a Diex en rant salu.
« Or tost », ce dit le duch, « n’i soit terme tenu,
« Car ja jor n’avrai joie, ce non soit mescreü,
« Tant qe j’avrai mon oncle e mes frer reveü,
« Oliver et Hestos, por qi soi morne e mu. »
Ancor parole Huon : « Dites moi, mon segnor,
« N’en amenrés vos gient qi vos facent honor
« E en mer e en tere ? Ce n’ert mie foulor
« Se vos i amenés de ceste jent la flor ;
« Volanter i viroient maint fiuz a vevesor.
— Amis », ce dit le duch, « je te pri por m’amor
« Que le nostre partir non metes en santor.
« Je m’an entand d’aler sens grailes ni tanbor,
« Aqilant, toi e moi e le fiuz l’aumensor.
