Plus n’i demorasent par le tesor Crasu.
De l’estor partirent, tost s’en sunt esmehu ;
Vers la cité s’en vont por torner a salu.
Iluec fu le vantage da ploisors coneü,
Car qi derier remist mort fu e confundu.
Païens ne porent més sofrir le grant hustin ;
Laser stovrent la place Carles le filz Pepin,
Car François segirent le rois a grant trahin ;
L’estendars passerent et l’ensaigne Apolin.
E Diex ! tant veïsez de mort et de sovin !
Por le canp reclerent les navrez pres de fin.
François crïent « Monjoie ! tuz morrez, Barbarin. »
Les abatus versent ou li Amoravin.
Le jor ont Espanois un crüel disiplin ;
Anc n’atenderent frere ni parant ni cosin ;
Vers la citez s’an vont, ce fu lor droit chemin.
Se durast l’enchaucier un petit plus veisin,
Ou lor entrasent dainz François et Angeïn.
Rollant s’en apercuet, s’en apella Tripin,
Ouliver et Hestous et Gerer et Gerin :
« Segnor, or deu bien feire ! car je voi tot l’engin
« Que oi avrons del tot Panpalune en dimin. »
Adonc escrie Hestous : « Cavaucés, dan coisin ;
« Anuit veul ouberger sor cil palés marbrin. »
E Diex ! qeil aventure lor vient a gran destin !
Car Rollant a gardez au paser d’un jardin,
E voit venir Bernars a loi d’un pelegrin :
- ↑ — 8967 ueisex — 8968 reclent — 8969 F. crierent — 8974 lenchaire — 8976 R. senapaiet — 8977 gerar gerir — 8978 due b. f. car ie uol.
— 8958 grasu — 8960 senont