A .c. et a .ccc. s’asenblent entre lor,
E quant l’on li giete o pains o autre sor,
Entr’aus se deronpent e fuient por paor ;
Quant l’on en son estant en rier a feit retor,
Por ferir sor le pain s’arengent tot entor,
Le petit i fert bien, asez plus le greignor :
Tot ensi sor li quens, d’orfnes avohieor,
S’asenblerent Paiens quant mort fu lor seignor ;
Qi fiert de darz, qi d’ace, qi de mace forçor.
Mais si com le mastins qi est de grant valor,
Quant les scerp l’aastent en stree alïenor,
O q’il veult si les chaçe soul mostrant ses retor :
Ensi con Durendart et as cous senz amor
Les cace onciant li niés l’anpereor.
L’arcivesque Trepins desant deu milsoudor,
E plus de mil des autres d’entre grant e menor ;
L’estree ont desbaree, pués montent sens demor,
Escriant « Chevaler saint Jaqes ! » a une hor.
En la prese ferirent, qi puet plus tost li cor.
Devers la terce stree monta el carefor
Le jantil Deinesmarch, isnel com veul d’estor ;
Veit ferir Hecubar de l’esplié frasenor,
Qe tenoit la baniere a la gent Pagenor :
Ne l’escuz ne l’obers ne li vaut un tambor ;
El cors le fist sentir la dereane dolor,
Mort l’abat dou cheval lez le pié de la tor ;
Ne le vit Saracins ne muast le color.
Quant verent Saracins por Ogier d’Alemaigne
Hecubar mort cheïr et trabuchier l’ensaigne,
Ansi s’esbaïrent com renart qe l’an pragne.
- ↑ — 10146 Q. u. françois p.
— 10120 Le vers semble faux ; mais comment corriger ? — 10122 Q. leue e. s. e. — 10123 P. f. le paiens — 10125 dorfires a. — 10127 fortor — 10131 as cons — 10133 de m. — 10137 plus manque — 10140 lesplee — 10144 le manque
