Les autres sunt lavez, qe furent stanc et las.
Asis les a trestoz a mangier Filidas :
De pains e de formage e de vins ont a tas,
Cars autre n’avoient e ne queroient pas.
Bien orent les destrés de fain e voine a sas.
Ansi mangient François come fols qi sunt gras.
Ec vos sor le palés Gilinberz de Biauvas ;
O que il voit Rollant, si dist : « Sire, qe fas ?
« Se tu viens avec moi, la greignor gient veras
« La defors la citez qe tu veïses mas,
« Ensaignes desploiees de cendaus e de dras ;
« Tote foes asenblent, Cristïens ne sunt pas ;
« Tot droit en ceste part vienent le petit pas. »
Adonc sont esbaïs de por toz le palas.
« Seignor », dist Filidés, « nel metés mie a gas.
« Ce est Folqenor de Noble, qe fu frere Gilars,
« E Noblianz, ses niés, e de Combres Landras
« Qe veignent por aler fere mal et forfas
« Vers les terres de Françe. Ne vos dotez humas :
« Pués que je taing o vous, tut sont oncis e mas. »
Sor la tor dou palés a une large fenestre
Se est apoiez Rollant, et Filidés a destre,
Et percuet tant ensaignes de blanz e de celestre
E tant heumes a or et tant rice sorveste,
Filidés demanda e dist quant il puet estre.
« Sire », dist li convers, « quant ils firent moveste