Quant il veult son nemi decliner en servage ;
E cil que d’avarice fera son guionage
A trop mendre de lui desire feir homaje.
D’armes et d’entresaignes et de destrés crenu,
De tref et de trevaches, de loges et breü ;
Trop se conforterent quant non rendrent trehu.
Par cescuns port de mer forment ont defendu
Qe ne partist navire ne gros et ne menu.
Entre Rollant li duc et Olliver son dru
Cevaucerent a Rome, o bien sunt receü
E totes lor demandes acomplies lor en fu.
De .xxm. chevalers fu Rollant revestu
Par entrer en Espaigne sor l’oncle Feragu.
Segnors, car escoltez, ne soit ne criz ne hu,
Gloriose cançons, c’onques sa pier ne fu ;
Ne vos sambleront mie de les flabes d’Artu.
Fort s’aparoilierent Bergognons et François ;
Le terme avoient d’estorer de terz mois.
Enz el cief de Navaire manderent le Denois
A garder le passaje a do mille Thiois ;
Mais nus senblant de gere ne auchuns estralois
Ne mostrent ne firent sor auchuns Espanois ;
Da l’uns a l’autre vont marcheanz et borgois.