Page:Anonyme - Macaire, chanson de geste.djvu/205

110–136

13

Macaire.

Si se porpense par sa grant malvaistié
Com la porroit deçoivre et engignier. (*)
En la cort ert uns maus nains bocerés (*)
De la roïne et dou roi moult amés.
Cil vint à lui, si l’en a araisné.
« Hé ! nains, fait il, de bone ore fuis nés !
« Tant te donrai de deniers monéés
« Riche en feras tot le tien parenté,(*)
« Se tu veus faire la moie volenté. »
Et cil li dist : « Or me soit comandé
« Ce que vos plaist, et sui aparilliés. »
Et dist Macaires : « Oés que vos ferés.
« Lez la roïne quant serés acostés, (*)
« Vos li dirés de la moie belté, (*)
« Et se fesist la moie volenté,
« Tel druerie ne poroit on trover. »
Et dist li nains : « Or n’en soit plus parlé.
« Lez la roïne quant serai acostés,
« Miex li dirai que ne m’avés conté. »
Et dist Macaires : « De bone ore fuis nés !
« Si grans avoirs te sera ja donés
« Riche en feras tot le tien parenté. » (*)
Et dist li nains : « De rien ne vos dotés. » (*)
De lui se part tos joians et tos liés.
Et rest Macaires à son ostel tornés,
Si s’en repaire baus et joians et liés. (*)
Et à la cort s’en est li nains alés.