Plus de uit jors jut, ne se pot lever, (*)
Dont en la cort se vont esmerveiller.
Li rois méismes le fesoit demander,
Et l’aloit sempres Macaires essoiner,
Que chéus ert encoste d’un piler, (*)
Chief ot froissié, mais tost s’iroit lever,
Si qu’à la cort poroit il repairier.
Segnor, oiés, sachiés à escient
Que de Maience cele malvaise gent
Onc ne cessa mener noise et bobant ; (*)
Guerroia sempres Renaut de Montauban, (*)
Et si traï Olivier et Rolant,
Les .xii. pers et lor compaigne grant.
Or veut traïr la roïne au cors gent ;
Par son voloir n’ira ja demorant
Que ne honisse Kallemaine le franc. (*)
Uit jors malades fu li nains acouchans ;
Quant levés fu, si se trait en avant,
Chief ot d’un paile bendé estroitement,
Dont chascuns parle, li petit et li grant.
Li rois méismes en a ri bonement.
Et li maus nains, qui n’ot pas sens d’enfant, (*)
Ja à nului que fust el mont vivant
