Page:Anonyme - Macaire, chanson de geste.djvu/219

281—307

27

Macaire.

« Emprès serai por ta vie tenser. »
Et dist li nains : « Vos ferés come ber.
« Or vos taisiés et me laissiés ovrer,
« Que je sais bien ce qu’il i ait mestier. »
Et dist Macaires : « En aten bon loier.
« Ja de ceste oevre ne feras à blasmer :
« Quant l’emperere t’en ira apeler,
« Sempre diras, et ne t’estuet doter,
« Sovente fois o soi t’ai fait aler.
« Dont, se ne vuet li rois se vergoignier,
« A aube espine il la fera brusler. »
Et dist li nains : « Et autre ne requier. »
Li nains remest ens el palais plenier ; (*)
Vont s’en Macaires et l’autre chevalier
Ens en lor chambre dormir et reposer. (*)
Et li maus nains s’en vait acoveter.
Deriere l’huis de la chambre roiel. (*)
Et le matin, quant s’est li rois levé,
Si come l’uis se prist à trespasser,
Et icil nains ne fu mie laniers :
Devant le lit si se vait asegier
Et se despoille et prent à deschaucier.
Desor la banque laisse ses dras ester
Et si se vait ens el lit acouchier.
Et la roïne se dort sans mal penser.
Ne cuidoit mie que péust encontrer :
De traïtor ne se puet nus garder.(*)