Da Machario, li falso renoié.
Quel le destrue c’a li mondo in posté !
E l’inperer oit plevi e çuré
Qe la raina sera arsa e brusé.
De escuser soi la raina non fo moto parlé ;
Tal vergogna oit non oit le çevo levé,
Ela se clama dolenta, mal aguré.
Quant la raine oit veçu quele jent
E vi li rois de tanto mal talent,
Machario vi apreso lui ensement
Qe l’acusa duro et asprament
Pur debruser e no d’altro torment,
Donde fo presa d’acelle male jent.
En une part la mene secretament
Li nan da une altre part, darai pendent
Que la novele s’esparse por la jent,
Porme Paris, e darer e davent.
Çascune la plure, d’ele furent dolent,
Porqe tanto estoit savia et avinent,
Del so donava à la povera çent,
A li poveri çivaler qi non avoit teniment,
A ses muler dava le vestiment.
Cascun pregava Deo dolçement
