« E po no v’en pora reprender ni blasmer. »
Li rois l’intent, molto le pris à graer.
Otrié l’aust, quant Machario le leçer
Se le vait tot à contrarier.
E si le dist : « Çentil emperer,
« Con poés vos ces conseil ascolter
« Qe ces vos done qe ne vos ama un diner,
« Quant vol qe metés en resplaiter
« Questa justisie qu’e de tan vituper
« Qe no se poit par nesun hom çeler ?
« Et s’el est nul que la voia contraster,
« Prenda ses arme e monti en destrier. »
Quant cil l’entendent qe deveient conseler,
Quando oldent Macario si altement parler,
Mal aça quel qe voia sego tencer ;
Ne le fo nul qe le responda arer.
Dont vi li rois n’en poit por altro aler
De la justisie no se faça sens tarder.
Quando vi N. li rois asoploier,
De ilec se parte et laso li parler ;
De le palais quando se volse devaler,
Quant l’inperer no li consent aler.
Quando N. oit la parola oie,
De çuçer la raine li paroit gran stoltie,
