Li rois commande à un suen chambrelenc
Menée soit la dame tot avant,
De noir vestue et bendée ensement,
Si come feme que l’en mene à torment.
Desor la place del palais là devant
Aportent bois et espine pongnant, (*)
Si font esprendre un moult grant feu ardent.
Parmi Paris et derier et devant
Fu la novele portée par la gent.
N’i remest dame qui fust auques vallans,
Ne chevaliers ne péons ne marchans,
Illec ne viegne véoir le jugement.
Chascuns la plore de cuer et de talent.
Et Blancheflor menée est tot errant
Sus en la place devant le feu ardent.
Quant l’a véu, à genoillons se rent,
Et prie Dieu, le pere omnipotent,
Ceste joutice n’aille en obli mettant,
Si come muert sans pechié tant ne quant ;
Venjance en monstre Damediex ains lonc tens,
Si que le saichent li petit et li grant.
Or entendés, segnor et boine gent,
Que fist Macaires, li cuivers soduians.
Devant le feu ez le vos acorant,
Entre sa brace le nain s’en vient portant,
Et puis tantost à demander li prent.
« Nains, nains, fait il, ne me le va celant, (*)
Page:Anonyme - Macaire, chanson de geste.djvu/239
Le texte de cette page a été corrigé et est conforme au fac-similé.
524—550
47
Macaire.
