Page:Anonyme - Macaire, chanson de geste.djvu/251

670—696

59

Macaire.

« Un en aurés, sel vos donrai itel
« Que de la gent en aurés bon loier,
« Ne n’en ert nus qui vos en puist blasmer.
« S’ele est enceinte, grans seroit li dangiers
« De la roïne si malement jugier.
« Mais, se vos plaist et volés l’otrier,
« Vos la ferés à un des voz baillier
« Que il l’en doie et conduire et mener
« En terre estrange, fors de vostre regnier.
« Si li convient et dire et comander
« Que ne se laisse ne véoir n’esgarder. » (*)
Et dist li rois : « Bien fait à otrier ;
« Meillor conseil ne me porriés doner.
« Dès que vos plaist, et je le vueil gréer. »
Adonc la dame fait ariere torner,
Del feu la fait partir et desevrer.
Tote la gent en prist Dieu aorer.
Li rois la voit, si li prent à conter :
« Gentis roïne, moult vos avoie chier ;
« Faite avés chose dont ne vos puis amer,
« Et je vos vueil la vie pardoner ;
« Mais vos covient en tel contrée aler
« Ne vous puist on ne véoir n’esgarder.
« Et vos ferai très bien acompaigner
« Tant que serés defors de mon terrier. »(*)
La dame l’ot, si commence à plorer.
Et dist li rois : « Alés vos conréer,